港隊上場以2比0戰勝蒙古，該仗擔正並作出幾次撲救的龐焯熙（Bear），自評表現尚可接受，揚言今仗繼續爭取保持清白之身，又期望與剛「坐正」的盧比度產生火花：「港隊處於『重組』階段，而Chino一向肯試年輕球員，即管睇吓有咩火花；希望今場繼續零失球，不過睇番柬埔寨比賽片段，佢哋組織力唔錯，為港隊帶嚟好多麻煩，預咗呢次都唔易應付。」陣容方面，上場傷出的陳晉一受傷退隊，無法候命。

主教練盧比度（Chino）昨日與周緣德出席賽前記招，Chino表示會視今仗為試金石，為換血作準備：「陣中唔少入籍球員年紀開始大，唔會長期為港隊效力，加上我哋有唔少充滿天份嘅後生仔等上位，所以想實行年輕化，畀佢哋多啲發揮空間，希望班仔幾年後變得更成熟，今場正係好機會畀我哋試新嘢，部份上場冇踢嘅球員，今場可能得到機會。」至於周緣德則指教練團已做足準備，相信球員能適應當地天氣，是役交出更好表現。

另一邊廂，上周四（4日）友賽以4比0輕取不丹的柬埔寨，世界排名為第176位，較港隊低22位，兩隊曾於2022至25年期間連續4年交手，港隊錄得兩勝兩和，最近一次交手為去年11月13日，於香港大球場上演的友誼賽，當時踢成1比1平手。